திருவனந்தபுரம்: (Sanju Samson Cutout )கடவுள்நாடு கேரளாவின் குரல் சஞ்சு சாம்சன். தங்கள் மகனுக்கு டி20 உலகக் கோப்பை அணியில் இடம் கிடைக்காததால் ஆத்திரமடைந்த அங்குள்ள கிரிக்கெட் பிரியர்கள் தென்னாப்பிரிக்காவுக்கு எதிரான டி20 தொடரின் முதல் போட்டி நடைபெறும் திருவனந்தபுரம் கிரீன்ஃபீல்ட் சர்வதேச மைதானத்தில் சாம்சனின் பிரமாண்ட கட்அவுட்டை வைத்துள்ளனர். திருவனந்தபுரத்தில் உள்ள கிரீன் ஃபீல்டு மைதானத்திற்கு வெளியே, இந்திய அணி வீரர்களை வரவேற்கும் வகையில் சஞ்சு சாம்சனின் பெரிய கட்அவுட் சாலையை அலங்கரிக்கிறது. சஞ்சு சாம்சன் ரசிகர்கள் கேரளா (SSFK) இந்த கட்அவுட்டை வைத்துள்ளனர்.
அடுத்த மாதம் ஆஸ்திரேலியாவில் நடைபெறும் ஐசிசி டி20 உலகக் கோப்பையில் (ICC T20 World Cup) விளையாடும் இந்திய அணியில் சஞ்சு சாம்சனுக்கு இடம் கிடைக்கவில்லை. இதனால் அதிருப்தியடைந்த கேரளாவின் சாம்சன் ரசிகர்கள் தென்னாப்பிரிக்காவுக்கு எதிரான டி20 போட்டியின் போது அமைதியான முறையில் புதன்கிழமை கிரீன் பீல்டில் போராட்டம் நடத்தினர். இந்தியா VS தென்னாப்பிரிக்கா போட்டிக்காக ரசிகர்கள் சஞ்சு சாம்சனின் உருவப்படம் கொண்ட டி-சர்ட் அணிந்து மைதானத்திற்கு வருவார்கள். முன்னதாக, மைதானத்திற்கு வெளியே ரசிகர்கள் சாம்சனின் கட்அவுட்டை அமைத்தனர்.
ஐசிசி டி20 உலகக் கோப்பை, ஆஸ்திரேலியா மற்றும் தென் ஆப்பிரிக்காவுக்கு (South Africa) எதிரான டி20 தொடர்களில் விளையாடும் இந்திய அணியில் சஞ்சு சாம்சன் இடம் பெறத் தவறிவிட்டார். இதற்கு சமூக வலைதளங்களில் கிரிக்கெட் ஆர்வலர்கள் பிசிசிஐக்கு எதிராக கடும் கண்டனம் தெரிவித்தனர். இதையடுத்து, நியூசிலாந்து ‘ஏ’ அணிக்கு எதிரான ஒருநாள் தொடரில் இந்திய ‘ஏ’ அணிக்கு சஞ்சு சாம்சன் கேப்டனாக நியமிக்கப்பட்டார். சாம்சன் தலைமையிலான இந்திய ‘ஏ’ அணி, நியூசிலாந்து ‘ஏ’ அணிக்கு எதிரான 3 போட்டிகள் கொண்ட ஒருநாள் தொடரை 3-0 என்ற கணக்கில் கைப்பற்றியது. அக்டோபர் 5-ம் தேதி தொடங்கும் தென்னாப்பிரிக்காவுக்கு எதிரான 3 போட்டிகள் கொண்ட ஒருநாள் தொடருக்கான இந்திய அணியின் துணை கேப்டனாக சஞ்சு சாம்சன் நியமிக்கப்பட வாய்ப்பு உள்ளது.