TN govt order: இந்து சமய அறநிலையத்துறை கட்டுப்பாட்டில் உள்ள கோயில்களில் 40 செயல் அலுவலர் பணியிடங்களை உருவாக்கம் செய்து தமிழ்நாடு அரசு உத்தரவிட்டுள்ளது.
இது குறித்து அறநிலையத்துறை செயலாளர் சந்தரமோகன் வெளியிட்டுள்ள அரசாணையில், “இந்து சமய அறநிலையத்துறையில் புதிதாக 34 செயல் அலுவலர் நிலை-1 பணியிடங்கள் மற்றும் 6 செயல் அலுவலர் நிலை-2 பணியிடங்கள் என மொத்தம் 40 புதிய பணியிடங்களை தோற்றுவித்து அரசு ஆணையிடுகிறது.
புதிய பணியிடங்கள் உருவாக்குவதன் மூலம் நிலை-1 செயல் அலுவலர் பணியிடம் 100 ஆகவும், நிலை-2 செயல் அலுவலர் பணியிடங்கள் 117 ஆகவும் இருக்கும் என்பதன் அடிப்படையில் அப்பணியிடங்களில் பணி நிலைப் பிரிவு எண்ணிக்கையினை திருத்தி நிர்ணயம் செய்யவும், திருத்திய பணியிடங்களின் எண்ணிக்கைக்கு ஏற்ப தலைமையிடத்தினை நிர்ணயம் செய்து செயல் அலுவலர் தொகுதிகளை மாற்றியைமத்திடவும் இந்து சமய அறநிலையத்துறை ஆணையருக்கு அனுமதி அளித்து அரசு ஆணையிடுகிறது.
மேலும், கோயில்களை அவற்றின் வருமானத்தின் அடிப்படையில் நிலை உயர்வு/நிலை இறக்கம் செய்வது குறித்தும், செயல் அலுவலரை நியமனம் செய்வதற்கான வருமான வரம்பினை திருத்தி அமைப்பது குறித்தும் உரிய குழு அமைத்து சீராய்வு செய்யுமாறும் இந்து சமய அறநிலையத்துறை ஆணையர் குமரகுருபரன் அறிவுறுத்தப்படுகிறார். புதிதாக தோற்று விக்கப்பட்ட பணியிடங்களுக்காக நடப்பாண்டு ரூ.3.62 கோடி ஒதுக்கீடு செய்ய நிர்வாக அனுமதி வழங்கியும் அரசு ஆணையிடுகிறது.
அதன்படி செயல் அலுவலர் நிலை-1ல் பெரியபாளையம் பவானியம்மன், சென்னை, நங்கநல்லூர் ஆஞ்சநேயர், சிறுவாபுரி, பாலசுப்ரமணியசுவாமி கோயில், சென்னை சந்தான சீனிவாச பெருமாள் கோயில், அரும்பாக்கம் பிடாரி உத்தனாட்சியம்மன் கோயில், பாடி திருவல்லீஸ்வரர் கோயில், சென்னை வில்லிவாக்கம் அகத்தீஸ்வர சுவாமி கோயில், குமரகோட்டம் சுப்பிரமணிய சுவாமி கோயில், திருவிடந்தை வெங்கடேச பெருமாள் கோயில், பூந்தமல்லி திருக்கச்சி நம்பிகள் மற்றும் வரதராஜபெருமாள் கோயில் உட்பட 34 கோயில்கள் செயல் அலுவலர் நிலை-1 பணியிடங்களும், பாடி கைலாசநாதர் கோயில், மாடம்பாக்கம் தேனுபுரீஸ்வரர் கோயில், வியாசர்பாடி ரவீஸ்வரர் கோயில் உட்பட 6 கோயில்கள் செயல் அலுவலர் நிலை-2 பணியிடங்களும் தோற்று விக்கப்படுகிறது” என்று அதில் கூறப்பட்டுள்ளது.
இதையும் படிங்க: Healthy lifestyle : முடி வளர சின்ன சின்ன ரகசியம்..!