தீபாவளி சரவெடி: சீன நிறுவனங்களை ஓரங்கட்டவரும் மைக்ரோமேக்ஸ் ‘இன்’

மைக்ரோமேக்ஸ் நிறுவனம் நவம்பர் 3ஆம் தேதி இந்தியாவில் அதன் புதிய ‘இன்’ தொடர் ஸ்மார்ட் கைப்பேசிகளை அறிமுகப்படுத்தவுள்ளது.

மைக்ரோமேக்ஸ் கைப்பேசிகளின் அறிமுகம் தினம் நெருங்கிவிட்டதையடுத்து, ஒரு வாரத்திற்கு முன்னதாகவே, மைக்ரோமேக்ஸ் நிறுவனம் அதன் சமூக வலைதளப் பக்கங்களின் வழியாக வரவிருக்கும் புதிய கைப்பேசிகள் குறித்து மறைமுகப் பதிவுகளை இட்டு வருகிறது.

மைக்ரோமேக்ஸ் நிறுவனம் வரவிருக்கும் அதன் ‘இன்’ தொடர் கைப்பேசிகள் மீடியாடெக் ஹீலியோ ப்ராசஸர்களால் இயக்கப்படும் என்பதை உறுதிப்படுத்தியுள்ளது. ஆக புதிய ‘இன்’ ரக தொகுப்புகளில் மீடியாடெக் ஹீலியோ ஜி 35, ஹீலியோ ஜி 85 சிப்செட்டுகளால் இயங்கும் என்று முன்னர் வெளியான தகவல் கிட்டத்தட்ட உறுதியாகியுள்ளது.

தற்போது வெளியாகவிருக்கும் கைப்பேசிகள் மைக்ரோமேக்ஸ் இன் 1 ஏ, இன் 1 என பெயரிடப்பட்டு ரூ.7,000 முதல் ரூ.15,000 வரை என்கிற விலை நிர்ணயிக்கப்படும் என்றும் ஒரு தகவல் வெளியாகியுள்ளது. இது உண்மையாகும் பட்சத்தில் மைக்ரோமேக்ஸ் நிறுவனம் சீன, கொரிய நிறுவனங்களான சியோமி, ரியல்மி, சாம்சங் நிறுவனங்களின் இடைநிலை ஸ்மார்ட் கைப்பேசிகளுக்கு நேரடியாக போட்டியாக இருக்கும் என்று நம்பப்படுகிறது.