TN School Holidays: பள்ளிகள் தாமதமாக தொடங்கியதால் இந்த ஆண்டு கோடை கால விடுமுறை குறைய வாய்ப்பு உள்ளதாகக் கூறப்படுகிறது.
தமிழகத்தில், கொரோனா பரவல் காரணமாக, 1 ஆம் வகுப்பு முதல் 12 ஆம் வகுப்பு வரையிலான மாணவர்களுக்கு, கடந்த ஆண்டு செப்டம்பர் மாதம் முதல் நேரடி வகுப்புகள் தொடங்கி நடைபெற்று வருகின்றன. வழக்கமாக, 12 ஆம் வகுப்பு மாணவர்களுக்கு மார்ச் மாதத்தில் பொதுத் தேர்வு தொடங்கும். அதனைத் தொடர்ந்து 10 ஆம் வகுப்பு பொதுத் தேர்வும், பிற வகுப்புகளுக்கான ஆண்டு இறுதித் தேர்வு நடைபெறும்.
இந்நிலையில், நடப்பு கல்வி ஆண்டில், கொரோனா தொற்று காரணமாக, பள்ளிகளில் நேரடி வகுப்புகள் தாமதமாக தொடங்கியதால், பொதுத் தேர்வுகள் மற்றும் இறுதித் தேர்வுகள் மே மாதம் இறுதி வரை நடைபெற உள்ளன. அதன்படி, 12 ஆம் வகுப்புக்கு பொதுத் தேர்வு மே மாதம் 5 ஆம் தேதி தொடங்கி 28 ஆம் தேதியுடன் நிறைவு பெறுகிறது.
இதையும் படிங்க: Will Smith: ஆஸ்கர் அமைப்பின் முடிவை மதித்து ஏற்றுக்கொள்கிறேன்- வில் ஸ்மித்
11 ஆம் வகுப்புக்கு, மே மாதம் 9 ஆம் தேதி முதல் 31 ஆம் தேதி வரையும், 10 ஆம் வகுப்புக்கு, மே மாதம் 6 ஆம் தேதி முதல், 30 ஆம் தேதி வரையும் பொதுத் தேர்வு நடைபெற உள்ளது. இது தவிர 6 ஆம் வகுப்பு முதல் 9 ஆம் வகுப்பு மாணவர்களுக்கு மே 5 ஆம் தேதி முதல் 13 ஆம் தேதி வரை ஆண்டு இறுதித் தேர்வு நடக்க உள்ளது.
இதற்கிடையே, 1 ஆம் வகுப்பு முதல் 5 ஆம் வகுப்பு வரையிலான மாணவர்களுக்கு மே 13 ஆம் தேதி கடைசி வேலை நாளாக அறிவிக்கப்பட்டு உள்ளது.
இந்நிலையில், அடுத்த கல்வி ஆண்டுக்கான (2022 – 2023) அனைத்து வகுப்புகளும் ஜூன் மாதம் 13 ஆம் தேதி தொடங்கும் என்று பள்ளிக் கல்வித் துறை அறிவித்துள்ளது. அதன்படி, 1 ஆம் வகுப்பு முதல் 9 ஆம் வகுப்பு வரையிலான மாணவர்களுக்கு, மே மாதம் 13 ஆம் தேதி முதல் ஜூன் மாதம் 12 ஆம் தேதி வரை கோடை விடுமுறை அளிக்கப்பட்டு உள்ளது. 11 ஆம் வகுப்பு மாணவர்களுக்கு மட்டும் 24 ஆம் தேதி முதல் வகுப்புகள் நடைபெறும் என்று தெரிவிக்கப்பட்டு உள்ளது. இதனால் இந்த ஆண்டு பள்ளி கோடை விடுமுறை காலம் வெகுவாக குறைந்துள்ளது.
இதையும் படிங்க: ஆணாக மாற முயன்ற கல்லூரி மாணவி மீட்பு