கோலார்: Youth must join hands to build a great India : மேக் இன் இந்தியா, டிஜிட்டல் இந்தியா, ஸ்டார்ட்அப் உள்ளிட்ட மத்திய, மாநில அரசுகளால் செயல்படுத்தப்படும் பல திட்டங்களைப் பயன்படுத்தி, சிறந்த இந்தியாவை உருவாக்க இளைஞர்கள் கைகோர்க்க வேண்டும் என்று கர்நாடக ஆளுநர் தாவர்சந்த் கெலாட் தெரிவித்தார்.
கோலார் நந்தினி அரண்மனையில் வெள்ளிக்கிழமை ஏற்பாடு செய்யப்பட்டிருந்த பெங்களூரு பல்கலைக்கழகத்தின் இரண்டாவது பட்டமளிப்பு விழாவில் கலந்து கொண்டு அவர் பேசியது: நாடு சுதந்திரம் அடைந்து 75-வது ஆண்டை கொண்டாடி வருகிறது. சுதந்திரப் போராட்ட வரலாற்றைப் போலவே, 75 ஆண்டு காலப் பயணமும் இந்தியர்களின் கடின உழைப்பு (Hard work of Indians), புதுமை, தொழில் முனைவு ஆகியவற்றின் பிரதிபலிப்பாகும். இன்று இந்தியாவின் ஸ்டார்ட் அப் சுற்றுச்சூழல் அமைப்பு உலகின் ஈர்ப்பு மையமாக உள்ளது.
குழந்தைகள் மற்றும் இளைஞர்களின் எதிர்காலத்தை வழிநடத்தவும், அனைவரையும் உள்ளடக்கிய வளர்ச்சியை ஊக்குவிக்கவும் உள்ளடக்கிய கல்வி முறைக்கு முக்கியத்துவம் அளிக்கப்பட வேண்டும். கல்வித்துறையில் தொழில்நுட்பம் மற்றும் தரமான கல்வியை வழங்குவதோடு, மனித விழுமியங்கள் (Human values), சுற்றுச்சூழல், நீர் பாதுகாப்பு குறித்தும் விழிப்புணர்வு ஏற்படுத்த வேண்டும்.
இந்த நாட்டின் எதிர்காலம் மற்றும் வளர்ச்சியில் இளைஞர்கள் முக்கிய அங்கம் வகிக்கின்றனர். டிஜிட்டல் இந்தியா, ஸ்டார்ட் அப் உள்ளிட்ட பல திட்டங்களை பயன்படுத்தி புதிய வேலை வாய்ப்புகளை உருவாக்க முடியும். மேலும், வேலை தேடுவதற்கு பதிலாக, வேலை கொடுப்பவர்களாக மாற வேண்டும். இதன் மூலம் மகத்தான இந்தியா, புதிய இந்தியா, தன்னம்பிக்கை இந்தியாவை உருவாக்க (To build a self-reliant India) முடியும் என்றார்.
இதில் பல்வேறு பிரிவுகளில் அதிக மதிப்பெண்கள் பெற்ற மாணவ, மாணவிகளுக்கு தங்கப்பதக்கம் மற்றும் சான்றிதழ்கள் வழங்கப்பட்டன. ஜெயதேவா இருதய அறிவியல் மற்றும் ஆராய்ச்சி நிறுவனத்தின் இயக்குநர் டாக்டர். சி.என்.மஞ்சுநாத் (Dr. C. N. Manjunath) சிறப்பு விருந்தினராக கலந்து கொண்டு சிறப்புரை ஆற்றினார். விழாவில், துணை வேந்தர் நிரஞ்சன் உள்ளிட்டோர் கலந்து கொண்டனர்.