ஏழுபேர் விடுதலை – அமைச்சர் கூறுவது என்ன?

சுமார் 30 ஆண்டுகளை சிறையிலேயே கழித்துள்ள ராஜிவ் கொலை வழக்கில் குற்றம் சாட்டப்பட்ட ஏழு பேரை விடுதலை செய்ய வேண்டும் என தமிழக அமைச்சரவை தீர்மானம் நிறைவேற்றி ஆளுநருக்கு அனுப்பப்பட்டு இரண்டு ஆண்டுகள் ஆகின்றன.

இந்த தீர்மானம் குறித்து ஆளுநர் முடிவெடுக்காமல் கிடப்பில் போட்டதற்கு உச்ச நீதிமன்றம் அதிருப்தி தெரிவித்துள்ளது. பல்நோக்கு விசாரணை ஆணையத்தின் விசாரணை நிலுவையில் இருப்பதாக ஆளுநர் தரப்பு காரணம் கூறுகிறது.

தமிழக சட்ட அமைச்சர் சி.வி.சண்முகம் இது குறித்து பேசியுள்ளார். “எழுவர் விடுதலை விவகாரத்தில் அதிமுக அரசு தீர்மானம் நிறைவேற்றியுள்ளது. பேரறிவாளன் நீதிமன்றத்தில் கொடுத்த மனு குறித்து ஆளுநர் முடிவெடுக்கலாம் என்று சொன்ன பின்பு, பல்நோக்கு விசாரணை ஆணையம் ராஜீவ்காந்தி கொலை வழக்கில் வேறு யாருக்காவது தொடர்பு உள்ளதா என்பதை அறிய அறிக்கைக்காக காத்திருப்பதாக கூறியுள்ளனர்” என்று தெரிவித்துள்ளார்.

மேலும், “ஆனால், எழுவர் விடுதலைக்கும், பல்நோக்கு விசாரணை ஆணையத்திற்கும் சம்பந்தமில்லை, ஆளுநர் முடிவெடுக்கலாம் என்று உச்ச நீதிமன்றம் தெரிவித்துள்ளது. ஆளுநருக்கு இருந்த தடை அல்லது சந்தேகம் உச்ச நீதிமன்றத்தால் தெளிவாக விளக்கப்பட்டுவிட்டது. ஆளுநர் இதில் நல்ல முடிவை எடுப்பார் என தமிழக அரசு எதிர்பார்க்கிறது. ஆகவே, நல்ல முடிவு வரும்” என்று நம்பிக்கை தெரிவித்துள்ளார்.